日本富士電視台每逢年底均炮製大型音樂騷《FNS歌謠祭》，今年同樣分「第1夜」、「第2夜」在昨日及下星期播出，本年度「第1夜」請來KinKi Kids、嵐、SEKAI NO OWARI、EXILE、氣志團、DA PUMP、平井堅、藤井郁彌、久保田利伸、濱崎步、倖田來未、森高千里、荻野目洋子、AKB48、IZ*ONE、櫸坂46等，動漫界新女神上坂堇，就有唱出人氣動畫《POP TEAM EPIC》主題曲，而影后中山美穗都站台大開金口，昨晚平均收視達14.2%。

中山美穗與富士電視台關係良好，今次再亮相《FNS歌謠祭》就大唱昔日名曲，包括相隔23年冇喺節目上演繹嘅偶像時代單曲《令人WAKU WAKU》，仲有曾被改編成《唯獨你是不可取替》、《衝動點唱》等中文版嘅《比起世界上任何人》，呢首92年推出嘅經典作亦屬美穗最暢銷細碟，當年佢拍住樂隊WANDS合作，並以兩個版本收錄在同一細碟內，累積多達180萬張銷售量。今次美穗唱出名曲勾起觀眾不少回憶，網民更希望WANDS可以再現身幕前同美穗合唱。WANDS於90年代紅極一時，94年為動畫《男兒當入樽》唱出片尾歌曲《直到世界終結...》亦屬破百萬嘅銷量冠軍，可惜組合已在2000年宣佈解散。

精選娛聞，喺晒《娛果》
http://fb.com/appledailyent