消費者委員會與一啲議員，大概抱有父母官心態，以保護消費者權益自居。其實香港人精過鬼，買棵菜都會格價，爭取最佳服務。惡佬明平時到街市買魚，魚販會係咁意同佢打鱗，點知最近打鱗打得好落力，好乾淨，服務有進步噃。返到屋企同老婆講起，老婆話：「最近街市不遠嘅超市賣埋鮮魚，打鱗打得好徹底吖嘛，你唔見我呢排多數去超市買魚咩？」
一啲師奶消息都唔知幾靈通，邊度駛倚賴消委會打價、教路吖，買魚買菜都咁精，一啲市民用兩百萬買個上車盤，一千萬買個豪宅區域嘅細單位，會唔會俾人誤導呀？或者會嘅，成數好低囉。用一千萬買個威水地區細單位（七百幾呎），絕非受瞞騙，而是有意如此，係要住高尚地段呀。如果唔係，做乜有人要用近千萬買西九凱旋門嘅五百呎與河內道名鑄嘅細單位？以同樣價錢，兩三年前在沙田設施、環境最好嘅駿景園，可以買千六呎向馬場大單位啦，難道買樓人士唔知道咩？一上網稍作搜尋就知道全港物業價格，銀行網站立即提供估價資料㖭。
花千萬元買干德道細單位，左丁山絕對唔會，但香港有好多人鍾意城市生活，鍾意干德道近有行人電梯直達中環街市，夠晒方便，晚上到蘇豪區玩樂，話都冇咁易，在IFC返工又好盞啫，行路返工放工都得。所有價格都反映晒市場心理、居民偏好，消委會唔會搵到有人揸住支槍逼人買樓嘅啫，業主就係業主，聰明到極，絕唔會係苦主──尤其是係有能力交幾百萬元首期去買干德道單位嘅業主。