噚日首度抵港嘅木村拓哉細女光希，今日下畫中環出席代言彩妝品牌嘅Pop up store開幕活動，同場仲有潮人黃偉文、徐濠縈、袁澧林、何超蓮、歐鎧淳、陳瀅、倪晨曦同王敏奕等。

視木村為偶像嘅阿徐被問到見到偶像個女，心情會唔會緊張，阿徐話：「係呀，我好鍾意木村㗎，愛屋及烏吖嘛，希望啲人都鍾意我個女啦！今次都好期待見到佢個女，我都生得佢出㗎喇，我想睇吓佢高啲定包包（阿徐女兒陳康緹）高啲。」

講到木村冇嚟會唔會失望？阿徐話：「通常都係阿媽湊女嘅，我唔怪佢，其實自己之前都曾經見過木村一次，係好耐之前嘅一次探班，嗰次係余文樂拍戲，余文樂打俾我叫我快啲過去，我記得當時我好緊張，戴住副太陽眼鏡都唔夠膽除，等佢換完衫喺我前面經過，見偶像就係咁㗎喇。」

問到佢點解當時唔合照？阿徐話：「我唔敢呀，知道日本人唔鍾意，有啲朋友住喺木村屋企附近，見到啲藝人都唔會騷擾佢哋囉，或者搵佢哋合照。如果再見到偶像都唔會打搞啦，除非Eason識咗佢啦，都唔奇㗎嘛，都有機會一齊合作。」

再問阿徐會唔會同光希講好鍾意佢爸爸，阿徐話：「我諗呢幾日都有好多人咁樣同佢講㗎喇，都唔使啦，其實佢媽咪（工藤靜香）都好有型囉！」咁唔知阿徐會唔會俾個女出道，因為光希都係15歲，阿徐話：「我個女啱啱14歲，我check過光希大佢差唔多兩年，因為光希就嚟16歲，如果光希都可以出嚟做自己鍾意做嘅嘢，包包都係讀多一陣書先啦，佢都係比較怕醜啲，（會唔會反對？）如果佢鍾意而唔影響學業嘅都冇問題嘅，但暫時都冇呢個打算。」

問到有冇啲品牌向包包招手，阿徐話：「耐唔耐都會有人搵，不過佢都知道我唔會（答應），包包暫時都冇興趣。」佢仲話包包冇跟住嚟，因為個女鍾意韓星多啲。

精選娛聞，喺晒《娛果》
http://fb.com/appledailyent