【新增內容】
去年10月韓國《韓國日報》取得一份100頁文件，指前總統朴槿惠嘅辦公室向「文化體育觀光部」發出公文，當中近千名文化圈人士被列入黑名單，當中包括《逆權司機》男星宋康昊、影后金惠秀與《原罪犯》導演朴贊郁等人。噚日韓國傳媒再公開演藝界黑名單，公開一份前總統李明博執政時嘅演藝界黑名單。

根據資料顯示，前總統李明博執政時，政府以政治傾向、參加示威遊行、攻擊李明博等理由列出一份演藝界黑名單，當中包括文成根，韓劇《別有用心的單身女》女星金圭麗等8名演員；李滄東、朴贊郁、奉俊昊等52名導演；金濟東、金九拉等8名主持；尹道賢、已故男歌手申海哲、金長勳等8名歌手，共82人。

而《韓聯社》再爆料，指韓版《步步驚心》男星李準基、文素利、劉俊相等人亦被封殺。據知李明博2008年不顧狂牛症問題，堅持進口美牛，韓國人民當年上街抗議，李準基亦於個人社交網站發文聲援，又痛斥使用武力鎮壓嘅警察，加上佢曾演出關於光州事件嘅電影《華麗的假期》，外界推測佢因此被政府盯上。

據知當時政府向相關單位施壓，禁止名單上嘅人亮相MBC及KBS電視台，介入相關藝人所屬事務所嘅稅務調查等，試圖令名單上嘅人退出演藝界。韓國檢察院對於呢份李明博執政期間嘅演藝界黑名單做出回應，表示將對此事展開調查，並追究相關責任人嘅法律責任。

而於黑名單內嘅38歲女星金圭麗，今日於Instagram留言，表示：「區區幾個字，我花樣嘅30代就咁樣轉瞬即逝，呢十年珍貴嘅時間啊，我呢段時間繳嘅稅都用嚟殺死我自己啦。」

另外，KBS電視台報道，韓國文化體育觀光部前部長日前以證人身份，前往中央地方法院出庭作證時表示，佢係於朴槿惠嘅指示下執行文化藝術界黑名單，透露朴槿惠曾表示，唔可以對有政治偏向嘅電影提供支援，必須對文化藝術界善加管理。