澳門同香港一水之隔，好多香港人鍾意weekend「過大海」玩兩日，𠵱家澳門新賭場林立，間間金碧輝煌，有30幾年歷史嘅葡京相形見絀。其實葡京以前好巴閉，係遊澳必到之地，八方相信唔少香港人喺度有深刻兼「昂貴」嘅回憶，賭王何鴻燊下令拆卸重建，又多一個港人集體回憶地標煙消雲散。

有澳門人同八方講，其實當地賭場有唔少奇聞怪談，可能隨舊賭場一一拆卸湮沒歷史。據佢講，澳門賭場唔畀小童入場有段古，唔想細路染上賭錢惡習係其一，另一原因係相傳當地賭場除咗擺風水局，仲會養「鬼仔」，作用係掹住賭客後腳，就算贏咗錢，最後都要放番低（即係輸凸）畀賭場先出到門口。
唔係啩！有啲咁嘅事？八方聽完個心一寒，若然係真，咁以前拆咗咁多賭場，啲「鬼仔」無處容身咪好凄凉？賭場打開門口合法做生意，使唔使搞呢啲靈異嘢呀！八方咁多年嚟，就從來未聽過賭王講過行內有呢啲古靈精怪嘢，姑且當奇聞聽吓，信不信由你！
賭王細妹十姑娘一度喺葡京「揸數」位高權重，八方問佢對葡京有乜回憶，點知葡京係佢「禁地」，原因佢講過好多次，八方唔複述，詳情可睇佢本回憶錄。十姑娘同八方講，佢六年前最後一次踏足葡京，知道葡京出年拆卸重建幾感慨，佢話由於六年前經歷太難忘，𠵱家諗起都怕怕，言下之意，似乎想葡京快啲消失，拆咗都冇所謂。
雖則十姑娘見到葡京個心就唔舒服，但佢對葡京仲有啲感情，苦口婆心咁講，賭場硬件不過係門面工夫，如果睇見其他新賭場美輪美奐，就要搵國際級建築大師重建，係咪反映對經營賭場冇晒信心呢？要搞啲裝飾門面花招充撐呢？

十姑娘係賭業過來人，對呢門生意睇得好化，佢同八方講，如何不惜工本興建新賭場，最終都係過眼雲煙，想當年葡京鑲滿雲石、掛滿水晶，裝潢窮奢極侈，最終都難逃一拆命運，「如果對澳門有信心，應該學威尼斯人，唔止開賭場，搞埋會展中心，咁先對澳門長遠發展有好處。」
曾喺葡京打工嘅博彩職工會理事長鄭康樂唔捨得葡京，因為係澳門首間大型賭場，值得原址保留，八方贊成，建議改做圖書館警世。