咦，莫非Nortel都有一位李察王子？賓架C說：「當然冇！只係大勢所趨啫，全世界嘅TMT股，特別係電訊股，股價走勢一模一樣，就係2000年中見頂，之後一瀉如注，一沉不起。我記得Nortel股價最高去到近一百蚊加紙，最低跌到七毫子，幾乎跌走百分之一百，慘烈之處，猶勝電盈，只係Nortel小股東冇一位李察王子嚟做出氣袋！」
第二日，記得賓架C之言，特登上網查吓，搵電盈、Nortel（加拿大）、Vodafone（英國）、DeutscheTelekom（德國）、NTT（日本）、SingTel（新加坡）幾種電訊股嘅走勢圖，果然全部都喺2000年第二季或第三季見頂，然後跌到杰撻撻，直插太平洋，除SingTel之外，無一可以大幅反彈。新加坡電訊之與別不同，當然係有政府照住，在星加坡維持近乎壟斷嘅地位之故。2000年開始全世界電訊市場經歷咗翻天覆地嘅科技變化與市場開放，現在電訊固網資產愈嚟愈不值錢，電訊股無可能回復電訊公司壟斷之時嘅股價。