當年今日
關於我們

周末遊車河:西沙 榕樹澳
釣魚捉螺玩爬山車

蘋果日報 2002/11/30 00:00


平日去西貢食海鮮,一般都會沿西沙公路直入,條路行到爛,都唔覺有咩特別喎!但原來只要有心尋覓,你會發現西沙公路除咗有吐露港的明媚風光外,其實重暗藏多個玩樂點。好動的人可以去榕樹澳玩高速爬山車,再搭駁艇上魚排釣魚,好靜的人又可以選擇喺企嶺下新圍捉螺兼漫步堤壩,再唔係又可以去泥涌垂釣後飽餐一頓。不過如果你有一整日時間,就梗係成家人一次過玩齊上述活動啦!

記者:尹珊珊 攝影:伍慶泉
車輛提供:環宇汽車(25200636)
第1站:泥涌碼頭飽覽景致盡享美食
西沙公路近泥涌一段路,不嬲都有唔少人專程來光顧呢度的露天茶座,不過平時大家都只會喺對面的露天停車場泊低架車,但就好少人留意到巴士站候車亭側邊的小路,原來別有洞天。進入呢條小路後,行兩步就可以見到一整片石灘,吐露港海天一色的明媚景致就在眼前。再往前行到盡頭,經過聳立喺海邊的粉紅色小屋,就可以見到泥涌碼頭,平時這裏有不少識途老馬的釣魚郎,專程老遠來這碼頭釣魚,有心人請自備釣魚用具,要不然看着遊人在石灘旁漫步,風箏在藍天上飄呀飄呀,益發感受到一份與世無爭的閒情,人也變得特別心曠神怡。

彩軒園林茶館
地址:西貢北西沙路十四鄉泥涌碼頭
電話:26333377

泊車小貼士:
在泥涌巴士站有一個大型露天停車場,約提供40個車位,但咪表必須使用易泊卡。
第2站:企嶺下新圍捉螺釣魚一樂也
離開泥涌後,再將車駛回西沙公路往十四鄉方向,途經大洞村及西徑村,駛約5分鐘後,在左手邊可以看到企嶺下新圍的路牌,跟着往左轉直入駛進一條大斜路,到了盡頭後可將車泊在空地上,然後下車往右邊徒步直行,沿途你會看到不少樹林花草。大約5分鐘後會見到一間荒廢的小屋,再往左邊的小路直入,便到達了一個清澈見底的淺灘。呢個時候你可以走近水邊徒手捉螺,聽聞假日重有好多人來玩遙控模型船,無興趣的話可步過淺灘,再爬上用大大小小石塊砌成的堤壩上,觀賞一片寧靜清澈的海水,感受微微帶涼的海風,有相機就梗係要拍番張靚相呢!至於放喺車廂尾套釣魚工具,𠵱家亦可以再度大派用場。

泊車小貼士:
到了假日,村口會塞滿車輛,你可以將車泊喺遠少少到企嶺下老圍,對開有個露天停車場,大約可提供25個車位,然後再徒步返回企嶺下新圍,需時約15分鐘。
第3站:榕樹澳玩爬山車享受高速刺激
經過一輪比較靜態的戶外活動後,係時候要舒展一下筋骨。將車駛離企嶺下新圍後,沿西沙公路往北潭涌方向一直駛約10分鐘,經過企嶺下老圍,唔使幾耐就可以見到轉入榕樹澳路的路牌,左轉後往前駛約20分鐘,便可以到達榕樹澳村。今日遊車河的壓軸好戲,就係到村口的龍村樂一站式玩足半日。首先你可以租番架四驅爬山車﹙收費為每半小時$100﹚,在佔地三萬呎的爬山車場內一展身手,享受時速最高50km/h所帶來的刺激,就算本身唔識揸車亦都無有怕,事關呢種小型爬山車極容易控制,只要左手緊握煞車掣、右手負責畀油同收油,兼且識得控制軚盤向左右轉動,咁就已經可以順利駕駛。接住你重可以經車場直入,在一大片遙控飛機場上放飛機,不過設備要自己帶,又或者可以趁住水退,結伴走到海邊捉蜆。最後,你重可以經負責人安排下,坐駁艇前住榕樹澳對開的魚排,延續垂釣樂,好彩的話重可以為夜晚餐BBQ加餸㖭!

泊車小貼士:
龍村樂門口設有大量免費車位提供。
龍村樂
地址:西貢西沙公路榕樹澳村34號地下
電話:97104033
開放日期:逢星期六、日及公眾假期
開放時間:﹙BBQ區﹚上午11時至凌晨2時﹙爬山車場及魚排﹚正午12時至下午6時
外籍夫婦Craig同Louise雖然喺附近居住,但原來係頭一次來榕樹澳路散步,問到印象如何,兩人都異口同聲咁話:「呢度好舒服,一點都唔似香港,真係後悔咁遲先發現到。」Louise重猛讚條路好易行,就算推住BB車都唔覺辛苦。
駕駛貼士:
要入榕樹澳村,必須經過榕樹澳路,由於此路路面又長又窄又多彎位,重係單線雙程行車,故唔熟路就最好慢慢揸,將車速維持30至40咪就最安全。至於每逢星期六晚,傳聞會有唔少飛車黨在西沙公路出沒,兼且又多差人捉快車,記住要留意車速了。