33歲，星途浮沉嘅楊明(原名揚名)，桃花運就完全相反，多年來緋聞不斷，上年終於宣佈同拍拖3年嘅圈外女友Joanna拉埋天窗，結婚相都影埋，但去年10月婚事竟然告吹，婚訊變分訊，楊明當時話好過結婚之後要離婚喎。

不過話咁快，楊明又搵到新歡，今日有報道話，上星期日(16號)楊明被影到同一名長髮索女十指緊扣咁出現喺尖沙嘴，不過呢名新歡似乎就唔係溫柔型女友，落的士時呢位長髮靚女就向楊明發脾氣，黑口黑面咁塞幾十蚊車錢比男友，而過程中楊明一粒聲都冇出。

同前任女友散咗之後咁快搵到女友，令人懷疑楊明究竟係咪劈腿，佢受訪時否認，話上年5月已經冇婚約，話放低咗大半年先識現任女友，又否認兩人喺夜場認識，話自己依家好少去夜蒲喎!

其實楊明過往嘅情史真係「戰績彪炳」，好似陳敏之、佘詩曼、前任女友Elaine同Joanna位位都係索女，網上更曾經流出同Elaine嘅床照，佢咁貪玩喜愛夜蒲，未知現任女友收唔收服到佢呢?



爛片界盛事、由本報娛樂版舉辦嘅第九屆「金話梅電影選舉」（GoldenPlum）又嚟喇！請即click入網址投票，喺香港電影金像獎舉行之前選出爛片之霸！
↓↓↓
http://campaign.appledaily.com/goldenplum