李治廷（Aarif）同范冰冰嘅緋聞，隨着《武則天》播完、范冰冰公開埋同李晨戀情，已經正式落幕。不過Aarif依然有緋聞，但今次唔係同女，係同男，主角就係同佢一齊拍內地真人騷《花樣姐姐》嘅內地演員馬天宇，但係可能煲水味太濃，所以新聞炒唔起。

傳男嘅緋聞炒唔起，咁又傳番女啦！今日又有雜誌爆料，指Aarif有新戀情，話說今個月20日，影到佢同一個年輕女仔，喺清水灣屋企行出嚟，之後Aarif揸保持捷由清水灣去九龍城改衫，該女仔除咗全程陪到實，透過車窗仲影到Aarif一度將個頭貼近個女仔，好似好親密，最最最重要係女仔望住Aarif嘅眼神，真係兩眼發光咁。

本報今日都打過電話揾Aarif，可惜佢身處唔知幾多千萬尺上空，由羅馬飛緊去北京，所以暫時未有回覆。不過，佢聽日會喺北京出席品牌活動，是攣是直？到時自有分曉啩！