無綫重頭劇《金枝慾孽貳》首播第一周收視欠理想，與「膠劇」《神探高倫布》同得平均23點收視，輸畀處境劇《愛．回家》。

不過收視未有打擊演員信心，且更齊心谷宣傳，今日伍詠薇、陳豪、黃德斌及簡慕華等到將軍澳拍新宣傳片。

講到收視一般，伍姑娘話：「滿意，個劇支線多，平均收視算合理，陳豪入宮後就多事發生。」對於劇情被投訴沉悶，佢笑言：「多人投訴即係多人睇，大家畀多一個星期，有信心會追落去，啲對白係要嗒嘅」陳豪亦都附和：「冇錯，係有興趣至有問題！」

不過亦有觀眾投訴劇情攻心計，影響青少年心智發展，伍姑娘笑晒話：「使鬼我哋教咩？佢哋仲勁過我哋啦！」陳豪就認為確需要家長指引，而德斌則反問：「啲戲係要家長指引，咁負面去諗冇計，要靠大人解讀畀小朋友知，唔通警匪片唔教壞人？只係呢部咁特別？」