謝霆鋒及劉青雲等今日喺上海拍攝新戲《驚天破》，霆鋒表示今次部戲開咗兩三星期工，喺戲中動作場面唔多，主要係鬥智及講感情，佢又話今次新戲橋段幾新穎，係講轉移器官記憶，講佢哋接受器官移植之後，捐贈器官嗰個人嘅記憶都轉移埋佢哋身上。

講完新戲喇，要入正題，近日有報道指霆鋒女友王菲傳懷孕，問霆鋒最近有冇睇報道？佢話：「我冇睇報道。（王菲有咗？）唔答。」講到前妻張栢芝被向華強永不錄用，之後栢芝又被爆飛出劇組？霆鋒就笑笑口話：「你係咪想死吖？你咁遠水路嚟想畀人鬧呀？」

問佢有冇關心栢芝？霆鋒就話：「你問幾多句，我都唔會答。」此時助手就搭嘴：「不如問返部戲。」霆鋒就同助手講：「你畀佢哋問一個字啦，我會答『唔答0架」。」咁身邊人有冇關心霆鋒？佢都係話唔答。另外，有電視台問霆鋒係咪簽竇靖童，霆鋒都係嗰句：「唔答」。

另外，有指霆鋒為劇組親自下廚？佢話：「你哋咁都知？自己一路有做呢樣嘢。」