【曼聯炒摩佬】普巴經理人周一見祖記 曼聯嚇到即炒摩佬?
足球英國足球祖雲達斯意甲曼聯保羅普巴
據英國傳媒報道,普巴嘅金牌經理人拉奧拿星期一同祖雲達斯高層密會,有傳佢想幫曼聯中場保羅普巴重返祖雲達斯,不過有消息就指紅魔方面唔願放人,而今日摩連奴就被炒,唔通呢兩件事真係有關連?
普巴過去兩季喺曼聯嘅表現都時好時壞,加上一直傳出佢同領隊摩連奴不和,星期日對利物浦嘅雙紅會仲要連落場機會都冇埋,所以英國傳媒就指呢位法國中場想離開紅魔,重返成名地祖雲達斯。雖然普巴嘅經理人就已經開始幫佢籌備轉會,不過英國傳媒就指出曼聯唔想放人。事關球會相信普巴之所以踢唔出表現係源於佢同摩連奴嘅緊張關係,隨住摩佬帥位不保,普巴喺紅魔嘅處境就可能有變化,所以曼聯方面唔希望隨便再放走呢位青訓產品。
普巴嚟緊會唔會返祖記雖然就未知,不過佢近日就喺一個贊助商嘅活動入面同佢嘅祖雲達斯前隊友保羅戴巴拿重聚,兩個有講有笑鬼咁老友,唔知普巴有冇叫戴巴拿「幫幫口」,勸祖記買返佢返去呢?
--------------------
新球季,新陣容!利物浦 FC 18-19季球星進駐《BFB》!立即帶領紅軍,踏上登頂之路! http://bit.ly/2oQObi1
--------------------
《體蘋果》陪你睇波講波
https://www.fb.com/appledailysports