大台，確係大台，為咗做節目，病人都要出鏡。

上周四播出嘅《東張西望》，就走去搵咗58歲嘅劉家輝「遊電視城」，成個節目維穩、又賣溫情，主持人仲要「疑似」迫劉家輝笑，大台仲好「有情有義」，送咗隻硬膠公仔TVBuddy俾劉師博...網民、觀眾當然插爆似做騷。

今日通訊事務管理局指出，該節目收到63宗投訴，話內容有欠尊重、令人反感；又折磨中風病人，令人心痛及不安；及借機宣傳電視台等，這集收視得18點，約117萬觀眾。

未止0架，唔好唔記得大台仍然播出嘅內地膠劇《西遊記》，該劇上周平均收視得21點，約136萬觀眾，對比前一周再跌1點，再流失64000名觀眾。

通訊事務管理局回覆指，《西》劇上周再接到119宗投訴，累積至今已經有約1,219宗，指內容令人不安，要求腰斬等。大台方面上周繼續收到16宗投訴，要求停播及不應該放在黃金時段播。