利物浦上周三「懶係勁」咁贈熱刺雙蛋，周二又打回原形，作客僅和狼隊0:0，家又跌番去第5位，捧佢嘅球迷就好似坐激流咁又起又跌，呢隊紅軍咁「流」，真係令人「激」氣。
話利記逼和狼隊，一啲都冇誇張，除咗頭幾分鐘利物浦㩒住狼隊攻過一輪，之後就無以為繼，復出嘅謝拉特冇咩料到。狼隊見你紅軍只係「冇牙老虎」，梗係想咬番你轉頭，上半場奇雲杜里接應左路傳中，近門撞射僅僅斜出，換邊後又有一次近射，俾連拿救出；如果奇雲杜里生性啲，狼隊直頭可以贏埋。
有時我求大俠都覺得，賓尼迪斯係唔係「博炒」？踢咗大半場冇咩優勢，變陣都好正常，不過就用前鋒尼高治，入替左翼尼亞拿；將麥斯洛迪古斯移去左邊，古積特打番右翼，「死牛一邊頸」咁打單箭頭。喂！古積特上一場對熱刺先梅開二度，就算今場冇咩建樹，起碼夠勤力，喺前線做到竄擾。尼高治季初有過一陣亮麗演出，但近期已沉到不得了。而且後備席上，紅軍都仲有賴恩巴布、阿古蘭尼呢啲攻擊球員，點解又唔換人博一博呢？

棄將高治有波入

其實利物浦唔係冇好前鋒，只係冇好好珍惜啫，好似長人高治，加盟利物浦後坐冷板凳多過食飯，冇晒癮梗係嗌走，上季喺樸茅重生，今季轉到熱刺都算交到貨。周二主場對富咸，就由高治先開紀錄，2:0擊敗對手，熱刺先可以壓番住利物浦，升上第4位。
當然，坐得上利物浦呢隻「橡皮艇」，梗係預咗冇車仔、曼聯呢啲大郵輪咁安全，上吓落吓先過癮，周六紅軍又主場對保頓，要上定要下，睇怕賓尼迪斯都冇信心答到你。