如果時光倒流，如果老廉早十年成立，咁家陣都唔知有冇一位叫做馬會主席陳祖澤（JohnChan）嘅人。呢位車水馬龍佔咗兩瓣（跑馬同巴士）嘅小巨人，履新後噚日第一次宴請傳媒，席上回顧咗自己四十年來嘅光輝賭馬史（唔係倒馬屎），就爆出涉嫌利益衝突嘅猛料。

話阿扁過唔到06年

JohnChan7歲學人睇馬，22歲學人賭馬，當年（1965年）佢已經加入公務員行列，喺工商科做行政主任，工作包括管制白米入口，結識咗一位米商馬主。米商有次邀請JohnChan入快活谷睇跑馬，仲私人醒咗條貼士畀佢，叫JohnChan買佢隻馬，三倍幾熱門，真係贏咗，JohnChan買咗五蚊咁大把。
雖則JohnChan強調佢同米商當時冇利益收受，但係以今時今日嘅尺度，肯定一身蟻。好彩老廉喺1974年先成立，喺60年代嘅香港，JohnChan嘅行為未算犯法。
陳祖澤離開公務員隊伍十幾年來，從來唔講政治，噚日就破例品評立立亂嘅台灣局勢，不過都係蜻蜓點水。佢講咗兩句，第一句係陳水扁遲早落台；第二句有啲料到，佢估計阿扁過唔到06年。
63歲嘅JohnChan正職係九巴董事長，仲係公益金籌委會聯席主席，馬會同公益金兩份工都冇錢收，仲換來一身腰痠背痛。陳祖澤最近患咗俗稱「五十肩」嘅肩周炎，係一種積勞成疾嘅病，要睇醫生。肩周炎可大可小，八方勸JohnChan多啲休息，公餘除咗睇跑馬之外，不如學吓曾憲梓，喺馬會游吓水，舒筋活絡。