對於本地地產股，晉佳唔算睇得特別好，不過，恒基地產（012）可以當係一個特殊例子。前排恒地股價升得多，主要因為主席李兆基同政府傾好捐農地，將會私人從恒地買入一批雞肋農地捐畀政府，當然，四叔一向無寶不落，咁好死捐地實係有後着，市場估計，個別保持喺上市公司嘅靚農地，有機會開綠燈加快批補地價，然後起樓賺大錢，對於恒地同政府嚟講，都係雙贏結果。
新世界發展（017）主席鄭家純為梁營站台一幕，相信大家仲記憶猶新，之後股價遠遠跑贏同業，就知道同政府有偈傾嘅重要性。
恒地可以同政府有deal，有政治因素支持業務前景之餘，更重要係恒地大把農地喺手，等住補地價，他朝受惠政治因素嘅條件，比起新世界更實在。
以前大家覺得恒地批農地睇怕N年都傾唔掂補地價，所以當地皮有等於冇，𠵱家有機會由冇變番有，淨係一份憧憬都值得股價出現強勢，而市賬率0.7倍亦夠平。走勢方面，恒地捐地後股價爆升，但呢幾日港股低位有餘震，恒地股價仲係頭也不回，證明夠強，後市仍可看高一線，現價追入，中短線先睇60蚊。