中國無線（2369）主打客戶全部係祖國大孖沙級數，單係呢個優勢，已經脫穎而出，08、09年度PE仲係單位數，中國無線要昅昅。
中國無線主打雙模智能手機，主打客戶係聯通呢類大孖沙級數。喺3月頭，集團就宣佈同聯通華盛訂立協議，向聯通華盛供應總值最高達6.45億銀人民幣嘅雙模智能手機，呢個數額，已經等於中國無線07年度（12月底止）總收入嘅56%。
上星期，祖國報章報道，中移動同4家TD手機終端商簽訂協議，開放8個城市銷售渠道，中國無線又佔其中一席位，可為中國無線帶嚟增長爆炸力。
只係好保守計數，中國無線嚟緊兩年度維持15%增長，純利上到1.9億銀及2.2億銀，09年度PE得番6.5倍。以中國無線上番往績PE8.5倍水位，都要見0.93元，現價（0.71元）潛在回報率講緊30%。

　

至祥有變身概念

至祥（112）5月中舉行EGM，通過出售物業及古董資產畀阿媽華置（127）。以資產臨時代價5.35億銀計，代表至祥每股潛在套現1.57元。連埋至祥手頭淨現金，至祥每股淨現金值貼近2.36元，現價（1.66元）仲低過每股淨現金值。又至祥變現之後，再冇乜重大而實質業務，中線睇，有賣殼或者變身概念，純短打，以至祥每股現金值2.36元做目標，講緊要升42%。冷灶至祥，可以煲煲。