林作裕美瞞林母私定終身 着「婚宴」禮服IG吹水𠱁返發火阿媽
蘋果日報 2020/12/31 22:56
林作裕美Lily林媽媽結婚
2020年最後一日，娛樂圈傳來一宗喜訊，31歲林作與32歲裕美正式拉埋天窗！《蘋果》今日收到讀者陳先生透過「爆相爆片」分享，指林作今日凌晨踏正12時與裕美簽紙結婚，二人在林作位於半山麥當勞道寓所舉行婚禮，他們選擇在美國猶他州的網上登記註冊，並透過視像在海外律師見證下結成夫妻；現場只有十多位朋友、裕美媽媽及愛犬出席，未見一直反對林作與裕美拍拖的林作媽媽Lily現身。
婚禮簡單而隆重，裕美穿上一件開胸簡約款式的婚紗，林作則穿一套筆挺西裝配煲呔，左手戴上婚戒，禮成後二人甜蜜錫錫、笑容滿載。據悉林作今次決定是因為相信蘇民峰，今年9月，林作與林媽媽一齊上蘇師傅的玄學節目《搵陣》，蘇師傅批林作結婚最佳時機：「一係呢1、2年，最遲2022年頭，唔係就10年後過40歲。」林作憂慮錯失大好姻緣，所以不理林媽媽反對，決定在今年內迎娶裕美。不過，林作向來鬼馬，今日在facebook上載一張穿西裝的單人相，留言：「I am ready for tonight.」似乎是刻意將時間兜亂，暗示今晚有重大事情要宣佈。
林作：登記結婚只係想表達愛意
《蘋果》今日致電林作，對於瞞着阿媽與裕美昨晚在家中簽紙結婚，他聽罷後反應甚大說：「邊個講㗎？冇啲咁嘅事（結婚），我哋呢幾晚開House Party之嘛！」對於為何會穿婚紗和禮服，而裕美媽媽亦在場，他就解釋說：「我哋做嗰行（保險）就收爐，同啲同事開Dress Up Party咪着成咁囉，其實呢幾晚都有人玩truth or dare，輸咗就話要畀幾張相《蘋果》登去整蠱我，我估有人有心做我！而裕美媽咪一得閒就會上嚟我度，咁噚晚佢都係上嚟玩。」他堅稱昨晚並無律師在場作見證，更說：「冇律師，係都係我嘅啫！」
林作連番否認和裕美結婚一事，但對於被揭在美國登記結婚，此時林作終於承認曾經做過。「我哋係有登記，不過都係玩吓啫，呢個只係表達愛意嘅行為，其實如果你哋check一下，會發現美國唔同州都有我個名，總之我而家呢一刻喺法律上係冇結婚，亦未有打算計劃結婚。」
裕美稱結婚順其自然
裕美與林作口徑一致，先否認：「邊個話呀？吓，完全唔知發生咩事。」後稱只是開派對，問到為何穿上婚紗，她牽強地說：「都有着嘅，但唔係結婚囉。因為我攞嚟影相，人哋送嘅，但唔係林作，佢唔會送嘢俾我。」追問有沒有計劃結婚？她說：「阿作成日都話感覺好似結婚咁，但佢現在講嘢我都唔係好信，因為佢太叻講嘢。我就冇乜所謂，又唔係未結過婚，哈哈，雖然我由細到大都好想有個完整家庭，但有時太心急會弄巧反拙，順其自然啦。」
是否擔心林作媽媽反對，所以低調？她說：「當然你問我，我都希望伴侶嘅屋企人喜歡我，但呢啲冇得迫，基本上我哋(與林媽媽）唔係好熟，傾過唔係好多次偈。我就真係未試過有伴侶嘅家人唔鍾意我，通常分開係好唔捨得對方屋企人，好似之前意大利嗰個男朋友，佢屋企人超錫我，尤其我單親家庭，佢爸爸特別錫我，原來有爸爸感覺咁好，所以好唔捨得。」對於被指裕美媽媽都有在場作見證，她解釋：「佢哋成日上嚟開Party，因為我有間屋喺堅尼地城，媽媽間中嚟探我，冇可能成日自己一個人喺嗰邊。」
林作2017年與麥明詩分手後，同年年尾跟失婚裕美出席麥玲玲飯局認識，林作當晚一見裕美即嗒糖，有傳林作橫刀奪愛，裕美才跟外籍男友Alex分手。今年6月，裕美和林作被《蘋果》獨家影到拖手斷正，即大方承認戀情，想不到半年後便私定終身。
就結婚一事，今晚林作和裕美搭正10點在社交網做直播，兩人穿回昨晚的禮服，林作一開口便說︰「本來就收爐，但今日見到結婚嘅新聞，其實我諗住今晚先爆出嚟開吓玩笑，而我嘅團隊有條友想賺錢，真係send咗相畀《蘋果》。我哋並冇結婚，唔好意思講咗成日，各位我再次重申我並冇結婚。」在旁的裕美亦說︰「我一日未結婚一日都係single。」林作再表示︰「我係畀人過咗一棟。」之後兩人繼續在直播中發表結婚論，而相信林媽媽知道只是一場惡作劇，相信不會影響母子關係。
昨日與裕美簽紙結婚，疑先斬後奏，事前未有通知林母。
「林美戀」終於開花結果，以後可以叫裕美做林太。
裕美媽咪（左一）在場見證愛女再婚。
林作今早暗示今晚「有事」，未知是否想趁元旦才公佈婚訊。(IG圖片)
林作結婚，卻沒有預林媽媽出席做見證。（資料圖片）
林作媽咪目前身在大陸，阿仔卻忽然閃婚做人夫。(資料圖片)
林作和裕美今晚穿回昨晚的禮服，開live澄清冇結婚。（影片截圖）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！