台灣藝人徐熙娣（小S）為老公許雅鈞有份投資嘅連鎖麵包店胖達人代言時涉及詐欺，而接着許雅鈞同許父又捲入商業罪案中，小S日前都要接受調查，甚至傳出小S同老公婚姻亮紅燈，認真頭頭碰着黑。

據台灣媒體報道，自小S捲入風波後，由佢同蔡康永主持嘅人氣節目《康熙來了》收視亦首當其衝，近幾日收視急跌，比以往少咗4萬4千幾人收看，不過《康熙》製作人陳彥銘就解釋，因為假日收視先受影響，唔係受「胖達人」風波影響，而中天發言人亦表示相信小S有足夠智慧面對呢次挑戰，佢哋亦冇打算換主持人。至於小S被傳喚作證後，就匿埋屋企足不出戶，小S住所外有大批傳媒守候，除每日保母車接送兩公婆嘅小朋友放學及司機買外賣外，其餘時間未見小S及許雅鈞蹤影，就連送文件都要委託助手代勞。