胡溫洗牌大執位，究竟影唔影響特區，成為呢幾日茶餐廳啲茶客同收銀珍及的士佬昌哥等嘅熱爆話題。
本來香港呢一壇，人人都知係中南海「唐曾」揸攤。胡溫一向冇聲出。不過近日形勢有少少唔同。大隻江交槍落台，阿胡喺四中全會講話，突然標咗句「保持香港長期繁榮穩定，是黨在新形勢下治國理政面臨的嶄新課題」，要「嚴格按照特區基本法辦事，不斷開創一國兩制事業的新局面」。
短短兩句，共有三個「新」字：「新形勢、新課題、新局面」。好笑喎，香港依基本法辦事，七年來都日日係咁講，有乜「新」可言？阿胡即是指：以前由於細佬我未坐正軍委主席，香港唔到我話事，現時唔同嘞，我要接手嘞，現時嘅新形勢，黨就即是我，唔係阿江，因此香港係一個新課題，要開創新局面。