大學近年搞春茗似乎唔多鍾意只係食餐飯就算數，總係要搞吓新意思，嶺南大學噚日團拜，除咗安排學生舞獅之外，一眾高層仲齊齊煎蘿蔔糕畀記者食，副校長陳增聲仲話，自己係一家之「煮」，煎糕咁簡單嘅事點難到佢。八方眼尖，睇到大廚早早已經準備好切好而且半熟嘅蘿蔔糕畀班巨頭，梗係明白點解大家咁有信心。
當交功課煎糕嘅校長陳玉樹反而好坦白，話自己甚少下廚，煮得最多嘅係即食麪，快熟，又可以用煮麪嗰幾分鍾休息吓，至於佢嘅「飛佛」係雞蓉味出前一丁。八方問佢近月丁麪不斷加價，會唔會越食越肉赤，陳校長笑言唔知價錢，「老婆買乜我咪食乜囉」。