已準備撤出香港，下季遠赴日本發展的三屆冠軍騎師莫雷拉，雖然在港策騎已近尾聲，但雷神講到明要贏埋今季冠軍騎師寶座，向一眾支持者答謝，有個好交代，現階段絕唔會放軟手腳，誓同潘頓力爭到底。

雷神停賽兩期後，嚟緊周三（13日）快活谷夜賽就會復出披甲上陣，俗啲講句，梗要擸齊架生招呼潘頓！

其中，已報爭當晚四班1200米第一組嘅「陽明滿滿」，雷神已在昨早（9日）正式過檔操練，三歲質新分子絕對係雷神搶糊籌碼。

隸屬蘇偉賢馬房的「陽明滿滿」，服役3戰配炒飯哥羅理雅、何澤堯場場成熱門，得1亞2第五表現不算差，但俱未竟全功。

這匹三歲馬本身愈跑愈進步，兼搏得少賺體力，季尾優勢特別大，難怪即惹起雷神注意，取得策騎權，看來馬匹在強配下，隨時坐正贏馬開齋。