話咁快又到7月，今個月大家除咗繼續煲《金祕書為何那樣》外，亦都要留意今個月有唔少新劇會上，當中睇陣容就必數由李秉憲主演、《太陽的後裔》編劇金恩淑編寫嘅《陽光先生》(Mr. Sunshine)，因為《太陽》關係，呢齣劇被睇好為今年嘅神劇。

（一）KBS《妳的管家》（首播日期：7月4日）
由河錫辰、苞娜、李知勳、高媛熙等主演，劇集食住呢期改編嘅漫畫熱，同樣改編自人氣漫畫，透過「家政」來講人生嘅故事，故事以一班女生，親自找上門搵家政男傭來幫忙解決事件嘅劇集。

（二）tvN《陽光先生》（首播日期：7月7日）
由韓國神劇《太陽的後裔》、《鬼怪》嘅金牌編劇金恩淑執筆、國際明星李秉憲、金泰璃、柳演錫、卞耀漢等主演嘅最新tvN劇集《陽光先生》(Mr. Sunshine)，早前Netflix方面已宣佈會同韓國同步播，令香港劇迷可以緊貼追看。而《陽光先生》以19世紀後半的辛未洋擾時期為時間軸，講述一名出身僕人家庭嘅朝鮮男孩離開祖國，登上美國軍艦，多年後以美國軍官身份重返故鄉，卻愛上朝鮮貴族世家嘅女兒，更發現殖民朝鮮嘅陰謀。

（三）JTBC《我的ID是江南美人》（首播日期：7月16日）
JTBC新劇《我的ID是江南美人》又係另一齣改編自人氣網絡漫畫嘅劇集，並由車銀優、林秀香主演，劇集描述女主角因為生得醜樣，所以經常被欺凌，最後佢決心做整容手術令自己變靚啲，一心以為可以過新生活，點知入咗大學後所經歷又唔同自己所想一樣，令佢大感挫敗，而此時佢喺過程中就搵到真愛。

（四）tvN《一起吃飯吧3：Begins》（首播日期：7月16日）
唔經唔覺拍到第三輯嘅《一起吃飯吧3：Begins》，除咗男主角繼續由尹斗俊擔演外，女主角方面就由《Missing9》女星白珍熙出演，劇集繼續環繞「食」嘅主題。

（五）JTBC《LIFE》（首播日期：7月23日）
JTBC作為收費台，劇集製作越來越好，從收視成績陣可以見到劇集受歡迎。新作《LIFE》由雙男主角曹承佑和李棟旭主演，劇集班底亦都唔惹少，由《名不虛傳》洪鍾燦導演夥拍《秘密森林》嘅編劇李秀妍合作，《秘密森林》去年受到好評，而《LIFE》一劇就以醫院內嘅權力鬥爭為主。

（六）SBS《致親愛的法官大人》（首播日期：7月23日）
《致親愛的法官大人》由尹施允同李宥英主演，劇集講述同卵雙胞胎兄弟嘅故事，雙胞胎雖然同一個樣，但佢哋就完全擁有唔一樣嘅人生，
尹施允要一人飾演兩角，分別做有7次犯罪前科嘅弟弟，因為法官阿哥突然消失，令弟弟要頂替哥哥位置，搖身一變做法官。

（七）MBC《生死決斷羅曼史》（首播日期：7月23日）
《生死決斷羅曼史》故事又喺醫院發生，講智鉉寓飾演嘅神經外科醫生同李詩英飾演嘅內分泌科醫生嘅故事，男逞角係一個偏執狂，而女主角就一直深信「人生就係受到荷爾蒙所支配」，當李詩英認識了智鉉寓後，佢視男方為研究對象。

（八）MBC《時間》（首播日期：7月25日）
韓國女團少女時代嘅徐玄離開原本所屬嘅SM事務所後，就專注拍劇，佢去年出演50集長劇《小偷傢伙，小偷大人》後，今年就再攜《時間》回歸公仔箱，並會夥拍金正鉉、金俊翰及申珉錫等合作，劇集講金正鉉經歷人生最後光陰嘅男人，而佢因為毀掉咗徐玄嘅人生，所以決定不惜一切去幫助徐玄。

（九）SBS《雖然30但仍17》（首播日期：7月30日）
韓劇《愛情的溫度》男星楊世鍾同申惠善合作嘅新劇，劇情同劇名一樣，講男主角一直以為係自己令到申惠善死亡，所以一直封閉自己，與世隔絕。而申惠善就飾演13年前發行事故而陷入昏迷嘅女主角，佢因為昏迷13年，到有一日佢突然醒返，佢嘅內心就仍然停留喺17歲。

更多韓流，喺晒《娛果》
http://fb.com/appledailyent