沙膽虹以為陳茂波只是俾人叫司長局長叫到飄飄然，明知唔係呢方面材料都照做發展局長，點知唔止咁簡單，原來仲係周身屎！
《蘋果》連日揭露，陳茂波透過公司投資多個舊樓物業，並改裝成劏房出租，個別已出售獲利，但有兩個仍然經營中，分分鐘違反《建築物條例》；而出售的舊樓單位，其中更被《蘋果》揭發壓低成交價，明明值二百八十萬嘅單位，就登記一百二十萬出售，餘款一百六十萬就以搬遷費名目支付。由於該單位是以香港註冊公司持有，陳茂波咁做，很有可能少交了二十萬利得稅，損失的就是庫房。
沙膽虹認為，政府為釋除公眾疑慮，應馬上立案調查。陳茂波應馬上讓記者及發展局帶同獨立專業人士，進入劏房物業，調查有否違反《建築物條例》；稅務局亦應翻查陳茂波夫婦旗下公司的報稅紀錄，徹底調查有否逃稅，並盡快向公眾交代。
陳茂波用以投資這些舊樓物業的景捷發展有限公司，自他九七年辭任董事後，董事只由老婆擔任。即使陳茂波好似唐英年咁將責任推卸給老婆，亦好難推掉，皆因投資這大堆物業的資金來源、按揭擔保等，陳茂波也不容易卸責！
陳茂波周身屎，梁振英今次唔慌唔拿屎上身了！
沙膽虹