【新增記者會相片及內容】
韓國男團Wanna One前日起一連3日喺首爾高尺天空巨蛋開演唱會，當唱到《Pick Me》時，成員裴珍映遭跳起嘅邕聖祐撞到，導致裴珍映嘅耳朵被耳機刮傷，需要緊急下台接受治療，好在經檢查後就冇傷到耳仔同耳膜。不慎整傷隊友嘅邕聖祐十分自責，含淚同隊友致歉「對不起」，當聽到粉絲講「唔緊要」時，邕聖佑都忍唔住落淚。

至於裴珍映喺後台治療後再度上台，佢先畀邕聖祐一個擁抱，之後含淚同粉絲話：「抱歉令大家擔心，今日媽媽亦喺現場，希望佢唔好擔心。」此時裴珍映終於忍唔住喺台上爆喊，隊友都紛紛安慰佢。

事後Wanna One嘅事務所就表示成員因為受驚嚇先喊，又指裴珍映傷勢唔嚴重，唔會影響之後嘅行程，而喺演在演唱會結束後裴珍映已前往醫院接受咗治療，當中檢查結果耳膜冇出現異常情況，受傷部位亦唔需要縫針，僅需搽藥膏以及打破傷風針同食抗生素就可以。不過因為右耳受傷，所以裴珍映有一周時間要用返傳統耳機。

而Wanna One今日就齊齊現身為演唱會舉行記者會，對於上月底轉事務所，隊長尹智聖指因為Wanna One嘅合約唔係剩返好耐，加上要同時進行世巡同專輯活動，所以需要可以全力支持佢哋嘅公司，但透露暫時未有就延長合約問題討論過，現時主要專注世巡及專輯宣傳等活動。

提到噚日耳仔受傷一事，裴珍映就強調事件唔係邕聖祐嘅錯，係突然發生嘅事情，解釋自己喊嘅原因係因為佢好重視呢個舞台，加上有家人同粉絲喺現場，令到佢哋擔心大感抱歉，所以先流淚，又強調自己今日狀態好好，叫大家唔好擔心。而佢哋亦為之前嘅直播爭議再次道歉。

更多韓流，喺晒《娛果》
http://fb.com/appledailyent