石油價格升到每桶接近七十美元之後，大幅度回落至五十六、五十七美元一桶，於是汽油價格亦都回落，汽油零售商（加油站）已經宣佈減價，曾經問過一位的士老闆（擁有的士牌，租車畀司機之人）：「油價升升降降，對的士經營有冇影響？」的士老闆話：「應該冇嘞，的士已經用晒石油氣，石油氣價冇汽油咁貴，即使有影響都唔會好大。」
搭的士時，司機又呻：「只有政府話經濟好啫，鬼信。我就話經濟未好過，即使好都唔輪到我哋，睇吓我每日做幾多錢一更就知啦。」問佢用石油氣係唔係好抵，司機話：「平就係平啲，不過加氣站唔夠多，唔方便，成日要排隊一小時，政府應該要周圍開多啲加石油氣站，方便我哋先至係叫做以民為本。」

油站唔係政府開嘅，加氣站應該都唔係政府開嘅啫，你估講吓就開到咩，後來碰到一位在油公司做咗幾十年嘅朋友，佢間公司嘅加油站遍佈港九新界，於是問佢哋點解唔開多啲加石油氣站，朋友話：「你都唔知行情嘅，石油氣站幾年前由政府招標，石油氣加氣站與我哋公司無落標。」有生意都唔去投標？笨啲喎。朋友繼續講：「我哋啲柴油生意少晒，的士唔嚟，貨車貨櫃車會喺內地加油，此乃大勢所趨，冇得講。但係政府批地畀石油氣站，免地價，條件就係石油氣零售價由政府批准，每半年一次，唔似汽油價咁樣話升就升，話跌就跌。政府控制價格嘅生意，邊度做得過㗎，我哋咪唔投標囉。」
據佢話，因為國際石油氣價一樣上升，但本港的士用石油氣價追唔上，石油氣站根本做蝕本生意，賣多啲，蝕多啲，故此加氣站經常「壞泵」，壞咗就好耐都整唔番。騎騎，氣泵壞咗，想做多啲生意都唔得啦，故此的士司機入氣排隊，好有道理。問清楚啲，又有一類石油氣站價格可以隨時調整，每公升價格在三元三角至三元五角，有管制嘅氣站，氣價每公升二元四角至二元七角，想話快啲入氣呀，畀多啲錢就得。