大摩唱淡短期港股要調整，中移動（941）噚日被襟到實，港股在17000前徘徊，難以寸進，但收市後重磅股和黃（013）突然宣布以340億元出售和記港口20%，即係話畀人知旗下淨係港口業務資產已值1700億元（相當於和黃總市值的53%），相信資金下周有大條道理勁炒呢隻落後股。下周四期指結算，一場好淡爭霸戰即將上演。
凱暉國際（269）落實收購加林森林工業公司51%股權，噚日復牌。i師傅話佢諗住隻股有得炒，晨早睇實部大利是機，初初睇見市前交易時段叫價曾高至0.50元，即較停牌前報價0.139元大升2.6倍，但點知在9點40分後就大幅下滑至不足0.20元，比先前叫價0.50元低好多。幕後炒家好似喺度玩嘢，令佢唔敢跟。
凱暉以0.151元高開，升至0.155元後便無以為繼，跟住就開始回落，股價最低見0.14元，最後收0.144元，升幅收窄至3.6%。凱暉今次以1.54億元收購南美洲圭亞那國家森林約15.6萬公頃（約38.6萬英畝）的林木開採權，其中1.15億元以發行新股支付，每股定價不低於0.128元。
黑客話收到料，聽講凱暉在完成發新股後才會開快車。