【老婆陀B辛苦】張繼聰愛Kay宣言:地下有窿,我瞓低俾佢行過去
蘋果香港謝安琪張繼聰
謝安琪(Kay)同老公張繼聰月前宣佈造人成功,0依家專心陀b嘅Kay,不時被影到同老公拍拖行街,日前見到佢老公現身銅鑼灣行街街,之前仲有報道話張繼聰叫老婆換返對平底鞋。
高齡孕婦真係唔易做,0依家粗身大細,Kay都照樣陪老公shopping,日前同佢老公現身銅鑼灣,陀住5個多月B女嘅Kay,個肚都真係幾巨,搞到佢等lift嗰陣,佢都忍唔住要搓下條腰,正如阿聰話齋,今次Kay呢胎辛苦啲,害喜情況嚴重,作嘔、腰痛、好攰情況比上次明顯好多。
今日阿聰、龔嘉欣等喺觀塘出席活動,講到幫老婆換鞋,阿聰話:「其實係因為佢對腳腫搞到對鞋唔啱著,係佢主動話要買過對鞋,不過阿Kay佢好乖,如果我要開工,佢會留喺屋企,所以我放假就同佢周圍去!」
錫老婆錫到出面嘅阿聰仲話:「我0依家一叫即到,如果條路個窿,我都瞓喺地下俾佢行過去!」嘩,好肉麻喎!
同場嘅龔嘉欣話有朋友幫佢安排相睇飯局,但係佢話:「全部都推晒,我唔想再有緋聞,謝絕異性約會,就算拍拖都唔會公開,希望再公開嘅話,已經結婚!」