話咁快過咗暑假，無論旅行團，或者機票加酒店套餐即刻平番晒，又係費清外遊嘅時候。最新鮮滾熱辣就係台灣觀光局首次同本地旅行社合作，搞咗個台灣自行車節武嶺單車團，向港人介紹台灣公路最高點（海拔3,275米）風光，竟然送部成兩萬銀嘅公路單車；而新航假期嘅套餐首次加港幣$99，送張來回機票。

台灣觀光局香港辦事處主任蔡宗昇話，呢個月底出發武嶺單車團，定價比正常平兩成，屬於推廣價，只係辦兩團，專做運動嘅美和同康泰各做一團。呢個團包玩包食玩住，仲包埋按排單車、沿途支援車，再送埋單車衫、單車水壼等，同埋送出一部價值新台幣$1.8萬公路單車俾團友抽獎。

蔡主任話，依家香港人外遊好鍾意單車遊，而台中係其中一個熱門踩單車地點；今次除咗安排團友踩著名后豐自行車道之外，仲可以踩埋殿堂級單車挑戰路線，就係從清境農場至3,275米高嘅武嶺，全長21公里，又係電影《破風》場景之一，沿途山巒起伏，「山區風景好靚，希望畀單車友難忘體驗。」

新航假期都有筍盤選擇，三日兩晚機票加酒店套餐優惠，原價港幣$2,399起，不但減價17%售$1,999，仲有額外加碼優惠；新航假期Rita話，只要加$99，就可以買到新加坡到泰國/馬來西亞來回機票，一個旅程玩兩個地方，「新加坡飛泰國/馬來西亞來回機票原價講緊$630，依家只要$99，都係首次做到咁平。」

費清＃要生計，也要生活＃毋忘初衷