聽到《十年》奪最佳電影而激動到彈起拍掌嘅會計界立法會議員梁繼昌（Kenneth），決定幫《十年》衝出香港，開拓東洋市場，佢話因為有唔少喺日本東京居住嘅朋友，對《十年》好有興趣，所以幫吓手，利用自己嘅網絡，替駐日嘅港人張羅一下。

查實Kenneth早前已經喺香港包場舉辦《十年》播映會，免費畀港人睇呢套香港嘅「預言電影」，反應極佳自然希望再接再厲，由於《十年》奪獎後，其中一位導演伍嘉良諗住安排《十年》再喺香港上映，所以梁繼昌唔駛再喺香港搞包場，反而可以專心幫《十年》衝出香港到日本，預計日本嘅電影院最快可以本月底放映《十年》。

嘩，幫《十年》落戶日本，Kenneth會唔會隨時成內地官媒批鬥對像，話佢「勾結外國勢力」㗎？

至於香港嘅觀眾呢，可以去南區利東邨欣賞《十年》噃。民主黨副主席羅健熙話，原來《十年》首個單元《浮瓜》喺利東一間中學拍攝，製作團隊透過羅健熙嘅議員辦事處招募臨時演員，所以睇《十年》時見到好多熟悉嘅街坊面孔，「搞到有少少分心」，而《浮瓜》導演郭臻更加係利東街坊。放映會喺五月一日晚七點喺鴨脷洲利東社區會堂舉行，收益全數撥歸《十年》製作團隊，有興趣者可到此網址查詢： http://goo.gl/forms/rmBrvTR8VO 。