今個月31號就係杜拜世界盃賽馬日，本來香港有多匹佳駟報名，諗住去杜拜闖一闖。點知好多報名馬近排非傷即病，又或者近績欠佳，將會放棄呢次遠征。

最終可能得一、兩匹馬正式坐飛機代表香港，例如一對蔡約翰馬房短途良駒「爭分奪秒」及「翩翩」，佢哋分別報名角逐阿喬斯短途錦標（草地1200米）及金莎軒錦標（泥地1200米）一級賽，成行機會樂觀。

日本方面，近日再有兩駒獲杜拜馬會邀請，出師3月31日呢個大日子。

佢哋分別為出戰杜拜司馬經典賽（2410米草地）的「里見皇冠」，以及爭奪杜拜草地大賽（1800米草地）的「新寫實派」，兩駒分別為前年香港瓶冠軍及舊年女皇盃王者，可謂夠晒卡士。

「里見皇冠」及「新寫實派」在杜拜所爭的賽事，與最有機會遠征杜拜的港馬所跑的賽事完全唔同。換言之，港日大戰到時將唔會在美丹馬場上演。