投資者從來最關心係一間公司嘅回報率，而不是公司規模有幾大。所以當潤電（836）和潤燃（1193）上周公佈搞合併時立即噓聲四起。市場通常會喜歡公司業務夠集中，容易預測和計數，細如周生生（116）都有唔少基金向管理層建議，賣走歷史悠久嘅證券業務，淨計珠寶銷售，會有助提升估值。所以將一間前景秀麗嘅燃氣股，和一間有少少黃昏味道嘅火電企業搞埋一齊，有乜可能會受歡迎？原則上已經行唔通。
從合併條款來講，今次都係一個令人失望嘅方案。首先潤電勁發新股併下潤燃，會令其每股盈利大幅攤薄；潤燃看似有溢價賺，但唔係收現金只可以收潤電股份，而潤電股價正不斷下跌中！即唔到最後一日我都唔肯定溢價有幾多，仲要處理因換股而產生嘅成手碎股、要折讓賣番出街。難怪有芬佬一肚氣，唔想理，沽咗貨先算。
至於合併有助降融資成本，觀乎兩間公司去年分別發行嘅7年和10年票據，息率係4.5厘和5.05厘，睇牌面就唔覺慳到嘅錢多到足以抵銷以上種種不利。管理層力吹嘅海外收購只係增大規模，而唔會扭轉到估值下調嘅大趨勢。如果我係潤燃股東我肯定會投反對票。

海迪