暑假大作《蜘蛛俠：強勢回歸》（Spider-Man: Homecoming），主角湯姆賀倫（Tom Holland)未上映就已經好紅，因為佢真係好勤力去晒世界各地宣傳，今日佢就專登去到巴塞隆拿，記者會上仲自爆認錯替身係「鐵甲奇俠」羅拔唐尼（Robert Downey Jr.），認真瘀爆！

噚日，導演鍾華斯(Jon Watts)、蜘蛛仔湯姆賀倫同傳緋聞嘅女主角辛蒂亞(Zendaya)就專程出席記者會，會上湯姆就首先自爆第一次見羅拔唐尼(Robert Downey Jr.)嘅情形：「我總共試咗5次鏡，到第4次嘅時候我見到羅拔唐尼，我一入房，就好緊張咁介紹自己，又話好鍾意佢做戲，突然之間，真正嘅羅拔唐尼行入房，我先知頭先嗰個係佢個替身！真係勁樣衰！」到最後佢經電影公司Instagram知道自己做到蜘蛛俠，過兩日就即刻要飛去片場拍《美國隊長3:英雄內戰》（Captain America:Civil War)！「「當我第一次着上套蜘蛛俠衫，我係覺得……失望嘅！因為套衫好鬆，又唔多啱身，直到今次呢套戲先有返個感覺。」唔知係咪刻意避忌，佢同緋聞女友全程都冇乜交流，反而同導演有講有笑，又大讚對方勤力。