【歐聯抽籤】南美聰睇好PSG 丘仔：二月休期對英超隊有優勢
蘋果日報 2019/12/16 20:47
歐聯PSG抽籤鄭兆聰丘建威梁冠聰
有哥斯達黎加門將基羅拿華斯(綠衫)效力的PSG，難怪南美聰願意投他歐聯信心一票。
歐聯16強抽籤已經出爐，效力東方龍獅兼足球評述員的梁冠聰和兩位名家鄭兆聰、丘建威為大家分析16強大勢。
英超今季再次有四支球隊晉級16強，丘仔指自己也會睇好英超球隊多些，他說：「其中一個原因係英超喺二月有一個少少嘅休息期，一周賽事分開兩星期打，每支球隊都先後會有兩個禮拜休息，對佢哋預備歐聯淘汰賽係一個好好嘅幫助。」
梁冠聰就對利物浦賽事感興趣：「利物浦對馬德里體育會我覺得係最強嘅盾對最強嘅矛，利物浦喺英超攻力好強勁，而馬體會繼續係西甲失球最少嘅球隊，最期待呢場比賽。而集中睇英超的話熱刺嘅籤最靚，對比馬德里雙雄，RB萊比錫一定係較弱。」
鄭兆聰綜合全部組合來說，巴塞隆拿面對拿坡里最為理想，另外他指出今次抽籤有些球隊的聯賽表現較失色，所以會主力在歐聯打出成績：「譬如曼城和拜仁慕尼黑，拜仁喺聯賽表現好差，一定會專心打歐聯；雖然曼城唔會講到出口，但肯定擺足心機打歐聯。」最後鄭兆聰私心指自己會撐巴黎聖日耳門，因為撐哥斯達黎加國腳基羅拿華斯。
記者：蘇兆麟