共有二十座樓宇的大型私人屋苑香港仔中心，居民投訴經常電力及鹹水供應中斷，平均每月一次；而在去年10月至12月短短兩月已至少停電四次，居民不滿管理公司安排失當，為他們帶來不便。

其中居民馮女士指出，近年香港仔中心鹹水中斷次數愈見頻密，有時每月一次以上，居民只好以食水沖廁。「咁落去都唔係辦法，好嘥水、又麻煩，有時重唔覺意倒到成個廁所地面都係水，周圍濕晒！」

兩月4次每次7小時
居於香港仔中心十多年的梁先生指出，除鹹水供應經常中斷帶來不便外，電力供應亦經常中斷，單是去年10月至12月短短兩月已至少四次，每次至少維持六、七個小時。
「好麻煩！夜晚十一點幾開始停電、一直至翌日朝早；𠵱家普遍打工仔嘅放工時間都唔會太早；試過一次收工趕唔切返屋企，冇電，迫住去人哋屋企借宿一宵！點解唔安排喺日間大部份人都返晒工、或者再夜啲，在凌晨進行呢？」

「點解要分咁多次？」
不勝其煩的住客麥小姐直斥管理公司安排不當，「成日都話檢查維修，點解唔集中一齊進行？點解要分咁多次呢？成個屋苑有二十座，雖然唔係次次都全個屋苑一齊停，但都會分批去進行，受影響嘅人數都好多！」