東洋女星澤尻英龍華當年演出催淚日劇《一公升眼淚》，佢扮純情不知賺得幾多觀眾嘅同情分，可惜之後形象衰到貼地，仲被爆未夠秤煲煙飲酒。

澤尻3年前露點演出電影《整容天后》總算收復失地，上年又擔演日劇《FirstClass》重返公仔箱，日前仲宣佈開始加入Instagram行列，不過就講明20歲以上人士才好follow，即係要夠秤嘅意思，唔少心水清嘅網民都估到帳戶似係宣傳居多。

澤尻果然係做咗罐裝啤酒代言人，佢為呢款全新產品拍嘅廣告已於當地播出，而佢就為呢個廣告拍攝50張自拍照，兩個星期前開始喺Instagram上陸續公開，當大家都讚澤尻喺廣告入面靚爆燈，點知官方公開一段拍攝花絮，就拍到澤尻一笑即魚尾紋暴現，畢竟佢出名係圈中蒲精，由細蒲到大就自然特別殘得快，澤尻下年4月就滿30歲，如果仲唔保養吓就神仙都難救咯！