入行多年,歐瑞偉作風極度低調,幾乎零是非零緋聞,係圈中數一數二嘅好好先生,而外形硬朗嘅佢,原來亦係好老公。日前就見到佢孖住結婚18年嘅老婆喺尖沙嘴行街,兩公婆仲手拖手好恩愛。
當日所見,歐瑞偉同老婆沿海防道一直行,主攻錶行同金舖,兩公婆尤其對手錶最有興趣,一直研究。見佢哋停喺錶行外面嘅櫥窗,歐瑞偉同老婆講想買啲成熟同簡約設計嘅款式,歐太就幫眼同畀意見,兩個人對住櫥窗手指指密密斟。
擾攘一輪之後,歐瑞偉最後都冇入去錶行,但見佢連自己要買隻錶,都會問清楚老婆意見。之後兩公婆繼續手拖手行去海運中心方向,結婚18年都仲好似拍緊拖咁,真係令人羨慕。
撰文:馮仁昭