巴士阿叔多次參選，今次政綱激過起義，聲稱爭取最低工資時薪100元，每日工時上限8個鐘，每周工作4天；兩日放假家庭日，一日畀夫妻享受性愛。佢老作古語有云：「有性愛，無戰爭。」巴士阿叔又要解散醫管局，爭取全民免費醫療，經費由富豪隨緣樂助，同時設立賭場同紅燈區，安排老人領養計劃，解決老人院宿位不足問題。
八方並非對狄娜不敬，之不過出選九西嘅林依麗，都堪稱奇女子啩，佢多年來爭取包二奶刑事化，今次參選繼續嗌呢句口號，新增政綱係保留功能組別，不過唔畀啲議員投票，即係得個講字，又建議取消農曆年、10.1放煙花，將費用救濟窮人，爭取立法全港商場商廈晚上10點熄燈，減少光污染。
另一奇人白姐姐政綱天馬行空程度毫不遜色，唔止要保留功能組別，仲要加多家庭主婦、在職婦女、80後青年、傷健人士同退休人士五個組別。同白姐姐一樣係出選九西嘅商人郭兆明，銜頭夠晒嚇鬼，報稱係國際釋迦文化中心主席，又係「國際共產黨員」，政綱係以六合彩攪珠方式進行選舉，候選人唔使拉票，包冇賄選問題，參選宣言好豁達，「若能零票紀錄落選，留一佳話，足矣！」