前日8.31香港黑夜，克警衝入港鐵車廂無差別用警棍狂毆市民，多人頭破血流，全城怒吼！身在澳洲悉尼參與Antidote Festival的何韻詩，昨晚在社交網撰千字文抒發心情，為自己不能在港跟大家並肩作戰感到罪疚，睇到警察無差別在港鐵打市民嬲到核爆，曾衝動地想取消行程立刻返港。

阿詩寫道：「不過冷靜落嚟認真思考後，結論係：唔得。呢個運動最寶貴地方正正係各人各佔崗位，拋開情緒做好自己崗位嘅份內事先係真正幫到個運動。而如果呢刻我需要做嘅係到外國轉述香港最新狀況，我就要盡力地去完成，即使有情緒，亦不能輕易退縮。」

阿詩通宵整合所有資訊，睇Live嬲到天光才睡，「今日一早起身到場地，攞住個iPad見人就畀啲片段佢哋睇。原來好多記者員工等已經自行跟上最新狀況，事實係大家都非常關注香港每秒發展，亦難以想像安定繁榮嘅香港會俾共產黨香港政府搞成而家呢個萬劫不復嘅地步。」

當步上講台，阿詩發現過半觀眾都是居住澳洲的香港人，中段播出過去兩個幾月香港的逆權運動短片，「音樂一起，見到大家過去八十幾日所經歷嘅日子，忍不住了，鼻頭一酸。我絕不會為強權打壓而落淚，但睇住香港人勇敢走過來嘅畫面，心情久久未能平復。我哋嘅年輕人為何要經歷如此痛入心嘅一個暑假？香港人真係好辛苦，年輕人更加辛苦，而未來日子必然地更苦。竟然有如此不人道嘅政府，重複犯下全世界都睇到嘅大錯，但仍不斷為所作所為找藉口、講大話、自圓其說？荒謬到極。」

最後Q&A環節，一位香港女生向阿詩發問，「到底人在海外，可以為香港做啲咩，眼見日日有人受傷被捕，覺得很無力。我話，就做自己最擅長的。而我想補充：多認識相同想法的人，組成社群、組成團體，一起行動。事無大小之分，想像得到的，都可以做，立刻做。行動唔需要諗有幾大成效，行動本身就係成效，會自然empower其他人。要有獨立思考，但不要讓自己孤單一個。共同面對，一起衝破。」

講座結束後，阿詩發現自己留下來的決定是對的，「不止香港嘅我哋，此刻許多海外香港人都很需要支援，很需要empowerment，需要知道自己在此場運動中也有其身位。今天是個難得的集體療癒，謝謝到場嘅香港澳洲人，以及全球各地與香港站在一起的人。我們都不是孤獨面對的，有你們作後盾，我們如此強大，又何止二三百萬人？」

阿詩的下一站目的地是墨爾本，她表示完成任務會縮短行程盡快歸隊，「香港嘅大家辛苦了，務必照顧自己照顧身邊人，萬事小心。 」

-----------------------------
【撐學生】
召集有心人 撐學生全年睇《蘋果》
立即按此