其實呢張大字報，係宣傳民建聯東區支部副主席黃建彬舉辦嘅「青年郊外野戰軍事訓練」活動，所謂進攻美國領事館，唔係真係炮打司令部，而係wargame活動之一，目的係考驗參加者面對攻擊目標，即係野戰中心內嘅模擬美國領事館時如何分工合作，同時喺限定時間內完成任務。民建聯為招徠，參加者一律有優惠，自備氣槍、服裝同BB彈只收100蚊，要大會提供裝備兼包埋午餐飯盒則實收200元，兩者都較原價平80蚊。
呢個以美帝為假想敵嘅行動聽日展開，八方噚日致電黃建彬辦事處查詢仲有冇名額，點知職員話反應踴躍，早已額滿。北角係土共基地，當年左派反英抗暴，以英皇道兩旁民居為根據地，育成唔少造反烈士革命小將，估唔到至今仍然保留解放區光榮傳統，人人捨得一身剮，敢把美國領事館拉下馬，沒有忘記階級鬥爭，砸爛美帝狗頭。
職員以為八方熱衷加入民建聯大軍，勸八方唔使灰心，話雖然目前唔知幾時再舉辦，但強調如果參加者反應好，類似打野戰活動可能陸續有來，叫八方密切留意。正所謂寧長社會主義草，不長資本主義苗，中國憤青圍攻美國領事館時有所聞，中美關係一有風吹草動，掀起反美情緒，美國領事館即時遭殃，俾人狂掟番茄雞蛋，香港都曾經發生呢啲事件。民建聯作為香港第一大愛國政黨，訓練後生仔學習進攻美國領事館，做法敏感，動機令人好奇，唔通日後想文攻武鬥兼備？