杜汶澤對自己要求好高，佢近年熱愛健身，除咗跟教練狂操變爆肌男，又食烚雞肉沙律，14年時拍電影《豪情3D》時，大戰日本AV女優，身形狀態最佳，其後為食稍為增磅，但阿澤都非常自制，一見上底線就會做GYM。

阿澤勤做GYM，亦會將成果放上網，近月接連有唔同藝人明星被偷相賣減肥產品，阿澤呢啲爆肌相，就成為咗最新受害者俾減肥產品盜用。對於肖像權遭侵犯，阿澤今日喺facebook貼文爆seed，嚴斥偷圖人士盡快刪相，並揶揄：「本人肥成咁，你都利用本人作為減肥產品的代言人，只會影響閣下生意，極為無腦。」

對於被盜用肖像權，阿澤今日短訊回覆《蘋果》：「已交律師處理，不便透露。」而阿澤經理人霍汶希今日回覆：「我哋同阿澤聯絡咗，事件已交公司法律部處理，保留法律追究權利。」

精選娛聞，喺晒《娛果》
http://fb.com/appledailyent