今年係李克勤入行30周年，9月假紅館舉行紀念騷，喺娛樂圈度過咗超過一萬日，克勤慨嘆：「我覺得好幸運！因為我冇覺得自己係條件非常好嘅歌手，但唔覺唔覺都唱咗30年，經過好多高低起跌、講錯嘢，但大家當原諒我又好、唔記得又好，又過渡咗喎，到o依家仲可以開演唱會出唱片。最近喺華仁做騷見番好多舊同學，佢哋可能讀書叻過我工作好過我，起碼我第一日開始唱歌，到o依家都係做緊我開心嘅嘢，去到茶餐廳都有人搵我影相，幾好吖。」

有錯要認，打要企定，克勤都試過言行失當：「好多啦，尤其我呢啲『嘴啫啫』，好似插旗（編按：96年克勤在無綫台慶，用「非法進入女性體內插旗」形容強姦）嗰啲，我覺得唔好，其實係一個好唔小心但又被引導咗嘅人為錯誤，啲稿係寫呢類嘢，記得綵排時何麗全仲喺度笑，到正式可能兩三個字眼唔一樣，但睇番唔係幾好，有啲不雅；我又試過喺選美講爆缸，呢啲字眼都唔係幾好。」

問到曾否介意過冇被封為四大天王？克勤坦言：「冇得介意，亦都介意唔到，四個人打牌，第五個冇得打，惟有希望打完四圈執位摻埋你玩咁囉，其實有時啲嘢好難講，柳暗花明又一村，如果當時係五個或六個人打牌，未必有左麟右李呢。」雖然克勤歌喉被讚零瑕疵，但亦有批評唱功刻板，佢大方表示：「我覺得歌手可以喺一個地方做咗咁長時間，而又未被淘汰，多多少少都有佢存在價值，o依家世代冇所謂，鍾意咪聽唔鍾意咪唔聽，等如碟頭飯你覺得好有風味喎，咁咪叫嚟食囉，如果覺得包裝唔靚想要去有冷氣，咪去其他餐廳囉，香港係自由社會，你咪揀你鍾意嘅，就係咁簡單。」

採訪：余燕儀、懷鈺
協力：劉嘉慧
攝錄：馮峰、Neo
攝影：葉君海
場地：祥勝茶餐廳
造型：Queenie Yu
髮型：Adolph Bow
化妝：Angel Y