已經做咗爸爸嘅韓國男歌手金泰宇，近日成為新聞人物，事關佢上MBC人氣節目《蒙面歌王》除低面具後嚇親觀眾，一向肥底嘅佢居然暴瘦咗N咁多個碼，幾乎令人認唔出，想問佢係乜水。

金泰宇因為肥嘟嘟身形而被歌迷起咗個花名叫「熊泰宇」，高峰時期體重高達113kg(約249磅)，腰圍都有44吋，不過佢下定決心減肥後，終於見到成績，0依家體重回落到85kg(約187磅)，即係搣甩咗28kg(約62磅)肥肉，而腰圍亦勁喊10吋，得番34吋，即時成個人slim晒，真係自信返晒嚟，吸啖氣都清新過人。

金泰宇話最明顯係唔見咗個肥肚腩，「以前被肚腩遮住，耷低頭望唔到腳趾，0依家終於望到。」提到作出減肥呢個決定，金泰宇笑言係因為喺廁所照鏡，發現望見嘅唔係熊而係豬，加上身邊人都擔心佢健康，佢自己又想唱番好啲歌，於是展開搣甩肥肉大計，改善不規則嘅生活習慣，注意每日飲食。

「為免體重反彈，我會努力keep住，下一個目標係想擁有朱古力肌。」嘩～咁Rain咪多個對手囉！