端午節吃糭是傳統文化，坊間的鹼水糭，在圍村裡稱為灰水糭，不同處在做來相當費工夫，而換來就是無添加的靚糭滋味。元朗新田洲頭村原居民文英嬌(嬌姐)，是僅存製作灰水糭村民之一，記憶所及，小時候吃的都是由她母親和祖母炮製、沒有鹼水味的灰水糭，然而兩老過世後，她失了童年滋味。她將重製灰水糭視為半生夢想，但製灰水糭須用上大量天然材料，加上砍柴、取灰以至製灰水等繁複工序，卻非一個女子所能承擔，而嬌姐最終能圓夢，背後還得靠丈夫鄭家鈿的一雙手。

採訪：林穎嵐 攝影：麥超億

「其實（佢）都幾好嘅，佢都保存咗阿媽嗰啲遺產，個果園又唔會丟空咗啦，其實都好恩惠，我都好欣賞佢。」嬌姐甜笑著說。她與丈夫鄭家鈿早已是老夫老妻，兩人成為夫妻超過30年，育有兩子一女，嬌姐是圍村原居民，童年都在圍村度過，印象最深並非自身百厭史，反而是母親和祖母留給她的灰水糭味道，「因為阿媽走咗，冇人有呢啲糭食，咁我個姨甥女又好鍾意食婆婆整呢個灰水糭，我就話不如我都試下整阿婆嘅味道俾你試下啦。」就是因為這份記憶中的味道，嬌姐與丈夫決心重製灰水糭。

「嗰時阿媽在生佢都有嚟幫手，成日外母都叫佢去幫手，去嗰度砍啲咩樹啊咁，都好樂意去做，之後媽媽走咗，咁就俾佢承傳咗啦。」嬌姐指丈夫跟母親關係密切。嬌姐丈夫鄭家鈿說話斯文，從記者到訪起約一小時沒有坐下來，一直忙著在灶頭生火、到果園砍柴，汗流夾背，「外母過咗身13年，咁呢13年嚟我都從不間斷，差唔多每日踩單車入嚟（洲頭村），上去打理個果園……好似話除下草，淋下水，有時啲荔枝木多得濟要落枝，咁落完枝之後啲荔枝樹，荔枝葉就要攞去燒，咁依啲都係日常要做定。」鄭生說。

製作灰水糭過程繁複，既要砍柴生火，還要擔心放灶頭的祖屋柴房有蛇蟲鼠蟻，「之前我哋冇裝鐵網即刻有條蛇走咗入嚟，後來我咪喺度放炮仗，用啲硫磺粉趕佢走囉。」別以為他也是村內居民，鄭生在訪談中不斷自嘲是「外人一個」。「我本身住上水，做文員嘅，但我自己都好享受大自然，好似外母過咗身冇人打理個果園，我覺得好浪費……」他與嬌姐近10年裡，每年都合作炮製灰水糭，一個負責到果園砍柴、在灶底儲灰及製灰水，另一個則負責包糭、搓餡和蒸糭，「佢做嘢呢就好快嘅，唔鍾意人喺度，同佢媽咪一樣，唔鍾意人喺側邊阻手阻腳……所以我哋整糭嗰陣就分工，你做你部分，我做我部分……因為我啲時間就鬆動啲，咪做番啲比較難處理嘅部分囉。」

「如果唔係好鍾意做呢啲嘢你好似覺得有個負累啊，將一啲嘢交咗俾我啊，佢又唔係喎，好樂意去做呢啲嘢。」對於丈夫多年來的付出，嬌姐坦言極欣賞他，更笑說：「係啊！我依家做咗佢助手啊，不過（負責）呼喝佢。」

你敢爆，我敢獎！ 即Call《蘋果》24小時爆相爆片熱線 ：63836568