當年今日

養精蓄銳下季再嚟
求驗客手記:佐敦誓挽面子

蘋果日報 2002/04/05 00:00


噚日對我哋呢班佐敦迷嚟講可以話係晴天霹靂,波神佢老人家突然宣布今季提早收咧,雖然喺季後賽見唔到佢令我求大俠好冇癮,但諗真啲與其佢勉強留喺球場死撐,搞到膝傷不斷惡化落去,不如提早休息,養精蓄銳等下季再大展身手咪重好!
波神今次復出唔單止幫唔到隊波殺入季後賽,自己重要受傷衰收尾;以佢嘅脾性,喺夏季一定會狂操,誓要來季再次喺球場上大發神威,挽回面子。
大家重記唔記得喺九四年,佐敦首次復出時多次喺球場上大出洋相,搞到公牛喺季後賽第二圈就俾人淘汰出局,不過一年後佢帶領公牛創下破天荒嘅七十二場常規賽勝利,所以我求大俠絕對有信心波神來季一定能重振雄風。

米路演變臉絕技
中國足球隊教練米路天奴域喺前日先對住班傳媒喊咁口話,國家隊𠵱家有成十一個球員受傷,令佢好擔心;點知一個屈尾十,喺噚日佢已經同老婆瑪莉雅去咗海南島度假四日。米路到達海南島時重四萬口面咁話要好好認識呢個中國夏威夷。雖然工作時工作、遊戲時遊戲係一件好事,不過米路似乎變臉變得太快喇!

查柏東尼用殘托迪
講開國家隊教練,意大利嘅查柏東尼最近亦老貓燒鬚。由於喺對英格蘭嘅友賽中,佢冇放韋利落場,但另一名有傷在身嘅托迪就正選上陣,結果搞到後者傷上加傷,要唞三星期。事後查柏東尼重喺度撐,話完全唔知托迪有唔妥,如果唔係一定唔會畀佢上陣。
卡達向「抽水」者宣戰
同佐敦同病相憐嘅卡達早排做完菠蘿蓋手術後,誓言來季一定要向所有喺佢負傷上陣時「趁佢病攞佢命」嘅球員還以顏色,卡達重誓神劈願話佢絕對唔係靠嚇,重話一定會以牙還牙。其實喺場中火併,向對方弱點進攻實在無可厚非,不過卡達發火,非同小可,曾經抽過佢水嘅球員,執生啦!

紅魔半力夠贏「李城」
曼聯真係命不該絕,碧咸冇想像中傷得咁嚴重,應該可以喺下個禮拜對拉科場歐冠盃落場。重有呀,雖則佢哋現時傷兵滿營,禮拜六對李斯特城,會冇咗碧咸、堅尼同華朗,只不過佢哋實力超晒班,就算半力出擊,呢三分都應該執硬啩!更何況,李斯特城幾已肯定降班,班球員應該散散哋,對住非勝不可的曼聯,真係唔輸就假。