噚日對我哋呢班佐敦迷嚟講可以話係晴天霹靂，波神佢老人家突然宣布今季提早收咧，雖然喺季後賽見唔到佢令我求大俠好冇癮，但諗真啲與其佢勉強留喺球場死撐，搞到膝傷不斷惡化落去，不如提早休息，養精蓄銳等下季再大展身手咪重好！
波神今次復出唔單止幫唔到隊波殺入季後賽，自己重要受傷衰收尾；以佢嘅脾性，喺夏季一定會狂操，誓要來季再次喺球場上大發神威，挽回面子。
大家重記唔記得喺九四年，佐敦首次復出時多次喺球場上大出洋相，搞到公牛喺季後賽第二圈就俾人淘汰出局，不過一年後佢帶領公牛創下破天荒嘅七十二場常規賽勝利，所以我求大俠絕對有信心波神來季一定能重振雄風。

米路演變臉絕技
中國足球隊教練米路天奴域喺前日先對住班傳媒喊咁口話，國家隊𠵱家有成十一個球員受傷，令佢好擔心；點知一個屈尾十，喺噚日佢已經同老婆瑪莉雅去咗海南島度假四日。米路到達海南島時重四萬口面咁話要好好認識呢個中國夏威夷。雖然工作時工作、遊戲時遊戲係一件好事，不過米路似乎變臉變得太快喇！

查柏東尼用殘托迪
講開國家隊教練，意大利嘅查柏東尼最近亦老貓燒鬚。由於喺對英格蘭嘅友賽中，佢冇放韋利落場，但另一名有傷在身嘅托迪就正選上陣，結果搞到後者傷上加傷，要唞三星期。事後查柏東尼重喺度撐，話完全唔知托迪有唔妥，如果唔係一定唔會畀佢上陣。