無限感激各界，一直支持我成為一個KOL。各種認同除咗令我即時飄飄然外，仲大增我的工作動力。

某日，我發現其中一個社交平台嘅「業績」突然停濟不前。算啦，都無咁瘋狂J堆數字，賽馬不如睇番數據。然後，呢個某日就漫延咗去另外兩檔嗰度。嗚......，得罪馬迷系列之約埋一齊抵制我嗎？明明就繼續收讚，太奇怪。

柴娃娃討論完，一查就見到真人加撐嘅同時，平台就幫我剷太空人。再問一問代購達人B嫂：「畀錢賣廣告嘛！」原來連我啲老友都睇我唔到，真係平行空間咁。哈！各平台，你哋都夠曬蠱惑啦！有隻馬好似都係咁蠱惑，或者可以話係練馬師同我哋玩捉迷藏，希望我今次真係捉到。

明日（23日）第八場嗰隻「愛添滿」都夠玩謝我，大前仗谷草二班1200米唔小心近咗一場，就開始留意佢，當然有唔少朋友同我一樣，所以佢跟住都無咁冷。死忍爛忍等佢落三班，操練上扮谷似縮，再忍。

「愛添滿」今次靚檔再有潘明輝減三磅，但求正常發揮。嗰場「激賞」跑第三，啱啱就輕鬆補中，「愛添滿」呢個第四都唔差，係時候要交代啦啩！