噚日佢變埋「好打得」,被問到立法會拉布會唔會影響改革進度,同埋點樣回應業界不滿財匯局將來權力過大,John潘強調,財匯局只係改革嘅其中一個團體,條例點樣寫,一切由政府決定,又搬埋「公眾利益」呢個神主牌出嚟擋駕。總之言下之意,佢哋只係有份參與,政府先至係推手喇。
John潘最為人熟悉,當然係佢嘅舊東家思捷(330),當年佢同邢李㷧、高漢思「三劍俠」創出思捷黃金時代,點知今年初佢被稅局追繳入息稅,不服上訴,先爆出原來當年雙方係不歡而散,高漢思畀咗一筆「分手費」要佢「安靜地離開」。John潘離開思捷8年,家陣專心做財匯局主席,同埋積金局非執董。