長毛枱棺材、嗌口號大家見得多，命理師傅楊天命同佢睇相，揭開長毛不為人知嘅一面。大家經常見到嘅長毛，成日上街嗌口號，死衝爛衝，但楊師傅話，原來長毛真正性格，係「內向、怕醜、含蓄、保守」。楊師傅話，雖然長毛早年經歷風風雨雨，更曾經坐過監，𠵱家算係「修成正果」，仲會繼續得到市民認同。仲有一樣，亦係八方恨極都恨唔到嘅，係話長毛命帶桃花，天生就係女人湯圓喎。
楊天命日前喺有線錄影《人生命書》節目，安排替長毛測運程。楊師傅形容，現年52歲嘅長毛，「條命算係一個傳奇」，佢早喺九年前開始入大運，雖然遲來，但就會行運行到63歲，所以如果要繼續做尊貴嘅議員，起碼可以做兩屆，由於長毛早年已應咗牢獄之災，之後再坐監機會唔大。但長毛自己就冇咁樂觀，話社民連呢一兩年內，一定遭受嚴重打擊，佢仲隨時有可能再受刑㖭，「坐監坐得開心，其實都係行運」。

分唔清友情愛情同性

上個月立法會開鑼，長毛同毓民喺議會「出蕉」，唔似以往范太在位時，大鬧一陣會守番規矩。楊師傅話，原來長毛天生怕女人，仲特別尊敬女性長輩，「所以范太講佢會收聲，曾鈺成講？就睬佢都儍。」長毛承認，因為范太係女性，所以唔想同佢嘈。至於長毛經常喺煲呔面前示威搞作，楊師傅話，兩人面相唔相剋，只係「性格相拒」。
喺節目上長毛又剖白感情生活。長毛講到同前妻30年前喺金禧運動上認識，但婚姻只維持咗三年，佢對呢段往事唔願多提，但坦言：「我唔係個好適合結婚嘅人。」不羈、又經常為政治理想同社會不平上街抗爭，仲不時同警方推撞，從另一角度睇有人會覺得好浪漫。楊師傅話，其實長毛命中，好多女仔鍾意佢。
傳聞長毛早前同一位德國籍女子發生一段情。長毛就話：「我諗住以為可以，但搞唔掂」，楊師傅就話其實係「桃花劫」，長毛聽完，承認可能分唔清友情、愛情同性。講起性呢樣嘢，楊師傅算到長毛上年有感情變化，仲單刀直入問長毛舊年同女性交往時，係咪包括性？長毛面露少少尷尬咁話：「好少啫」。最不可思議嘅，要算長毛話自己試過同一個女仔拍施後，手掌多咗一條感情線，大家求證係咪指佢位德籍女友，佢就話：「係個日本女仔嚟㗎」。

mailto:[email protected]