奉女成婚嘅吳若希，4月做人母，10月做人妻，同Alex Ho正式註冊，抖夠之後再度復出，拎番星夢一姐寶座，唱下劇集主題曲咁。但大家對吳若希嘅認識，都不離與網民開拖，開拖，再開拖。唔講唔知，原來佢入行後，曾經做過「宅男女神」，依家變成「十大討厭藝人之一」——商台節目《1圈圈 星光背後》梁泰來係咁講嘅。今集吳若希仲大吐苦水稱委屈。

講真…嗰陣時嘅吳若希，其實…曾經有一段好長嘅時間，見到欣宜，就一定見到吳若希，出席活動係咁，影專訪相係咁，秤不離陀，靠欣宜嘅人氣，去帶起吳若希。

關於吳若希嘅背景，大家應該都好熟下，福建來港後曾逼住公屋，入行只係四年已經升呢進駐何文田豪宅揸Range Rover出入，更與地產界林棣權（十哥）關係一度緊密，又傳十哥送千萬豪宅壹鑾同Tesla俾佢，更曾與就快六十嘅股壇狙擊手王弼燮成為知己，勁。不要忘記吳若希仲有個嗌佢做「爸B」嘅老闆何哲圖，又有個嗌「爹哋」嘅前經理人戴榮添（Simon），吳若希仲係經「爹哋」介紹認識成龍，去過成龍60大壽0架。

入行7年，原來吳若希今年25歲咋。負評係唔少嘅，例如將佢同某種食物拉上關係啦，例如話佢收入與支出不相稱啦，吳若希在訪問中，話自己有段時間因為承受唔到，而患上抑鬱症。

有關吳若希患抑鬱嘅故事，之前有另一種說法。嗰陣係傳吳若希同大自己十五年嘅男友交往，兩人打得火熱，點知男友媽咪反對棒打鴛鴦，兩人分手後，吳若希冇耐就有功能性水瘤屙血，身心大受打擊，更患上抑鬱，曾吞一樽安眠藥自殺……

但吳若希喺今次《1圈圈》訪問就話：「有段時間我好抑鬱，我有食抗抑鬱藥，應該是攞完金曲金獎後。人家抨擊我嘅工作、樣貌、聲線等，我都可以冇所謂，最委屈係傳我俾人包養。」

「由細到大，媽咪都灌輸俾我知，女仔最緊要就是清譽。我自己辛苦工作賺錢，租嘅屋買嘅車都係自己畀錢，點解咁樣傳？」即係嗰陣住何文田豪宅月租4萬、自駕80萬Range Rover都係自食其力。

「好彩我份人樂觀，食咗短期輕微嘅抗抑鬱藥，但嗰段時間個樣子變到好腫。」

更多娛聞，喺晒《娛果》
http://fb.com/appledailyent