當年今日
關於我們

【2分鐘瘦】夏天殺到又如何 衛詩雅三招搣走「拜拜肉」

蘋果日報 2018/04/14 08:00

衛詩雅2分鐘瘦

踏入咗3字頭嘅衛詩雅,為咗要留住索女身形,鑽研咗三招搣走手臂「拜拜肉」,詩雅話:「女仔好介意拜拜肉,因為好多時候着背心,夏天又就嚟,呢三個動作可以喺屋企進行,所以女士們做運動冇藉口,快啲一齊美麗起來啦!」
詩雅尤其推介TRX動作,係好簡單好容易做嘅運動:「喺體育用品店就可以買到,一條繩就可以訓練全身肌肉,無論手臂、大髀、小腿、腹肌都做到,因為佢有塊牌,將塊牌擺喺門嘅另一邊,閂埋門就可以頂實條繩 。」
第一招:TRX二頭彎舉
利用一條繩帶住身體向後,跟住好似引體上升拉前,拉入時吸氣,伸直手時呼氣,有一個小技巧,背脊要lock實啲,每下隻手要放盡啲,如果想難度高少少就踏前一步,身體斜啲用力會大啲,胸要挺直,效果會好啲。每組做20-30下,每次做3-4組,就可以操到老鼠仔。
第二招:啞鈴三頭肌屈伸
將啞鈴放身後成90度,手踭靠近頭部,用另一隻手傍實,可以感覺到手臂肌肉拉實,兩手交替做,每set做20-30下,詩雅話:「呢組動作有一個好處,冇乜機會出錯,唔容易受傷,好少用錯力,用手扶住拜拜肉,覺得每一下係實嘅就用啱力,我會揀2kg啞鈴唔會太重,甚至乎用裝咗水嘅水樽都可以做到。」
第三招:椅上撐體臂屈伸
詩雅話:「第三個動作係我最鍾意做嘅三頭肌,可以在家中利用一張櫈或床邊,雙手撐着櫈邊,好似掌上壓,重點手踭最好去到90度,跟住推上去做20下為一set,每次做3-4組,如果想增加難度,可以將雙腳伸直,人會重啲用力多啲,盡量pat pat貼近櫈邊,好容易感覺到曲腳同直腳分別,因應自己程度選擇。」
採訪:曹家誠
場地:中環FFG
精選娛聞,喺晒《娛果》
http://fb.com/appledailyent